DISASTER DO'S AND DON'T (MIZO)

KANGMEI (FIRE)

*Tlanchhuah dan tur ruahman lawk vek la, chu chu i chenpuite hrilh vek ang che.

*Tui bucket khat englai pawhin inah dah ang che. Kangmei tam tak hi tuia leih hlum nghal mai theih a awm a, dawhchawp chuan a tlai thei.

*Electric hmang bungrua chi reng reng hman zawhah OFF zel a, plug kha a socket aṭanga phawi zel tur. Current hrui zam (wiring) hlui leh chhia emaw electric fit dan chiangkuang lo/ṭha lo a awm em tih enfiah la, hlauhthawn awm thil a awm chuan electrician siam ṭhat tir ang che. Electric hrui zawm/vuah chhawnna (extension) hi fimkhur takin hmang ang che, vawikhatah tam lutuk vuah suh. Socket pakhat ah plug pakhat chauh vuah ṭhin ang che

*Electric hmanrua – istiri, heater, light etc. hi hman loh lai chuan off zel tur.

*Gas i hman loh lai chuan cylinder / regulator ah off ziah rawh.


LEIMIN ( LANDSLIDE)

*I in bul velah tuiluankawr / side drain ṭha lo emaw a awm a nih chuan ngaihthah suh ang che.

*Tui hawk luankawr ṭha tak siam rawh.

*Tuidawn ṭha tak nei ngei ang che.

*I in sakna lei leh lung inthuahthip dan  hrechiang hle rawh. A ṭul a nihphei chuan Geology & Mining lam mithiam te rawn ang che.

*Tuiluankawrh  hnawhin bawlhhlawh paih  suh. Hei hi leimin siamtu lian tak pakhat a ni.

*In i sak hma-in i sakna tur hmunah tuiput leh minna hnuhma a awm em tih enfiah hmasa rawh, leikhi leh hmun him lo a in sak ai chuan sak loh ngam a finthlak zawk. I nunna thapin engmah ti suh.


LIRNGHING (EARTHQUAKE)

*Lirnghin laiin Drop, Cover and Hold ti rawh : -

Drop (kun) : dawhkan emaw khum emaw rinawm leh nghet tak hnuaiah lut la.

Cover : i lu kha i ban in hliah /veng/phen la,

Hold : i ban lehlam khan dawhkan/khum ke vuan tlat ang che. 

*Safety kit siam la heng   –  tui, torch light, basic, medical supply leh i lehkha pawimawh photocopy te hi dahin hmun remchang rang taka lak theih in dah rawh.

*Lirnghing a ziaawm hnu ah, i in emaw school chhung aṭang khan chhuak la hmun awl zau lai pan ang che.

*Thingkung, sign boards,  in chhawng,   electric hrui leh ban hnaih ah awm lovin hmun ruak leh awl zau lam pan ang che.

*Buai phili ruai suh ang che, i him theihnan rilru fim put hram tum ang che, naupang, kum upa lam, nu naupai leh rualbanlote i bulah ṭanpui tur an awm chuan ngaihtuah tum rawh.


THLIPUI (CYCLONE)

*TV leh Radio aṭangin warning a    awm leh awm loh ngaichang rawh. Hei hian nasa takin a ṭanpui ang che.

* Thlipui hian ṭek a ken tel fo avangin thlipui tleh lain electronic thil reng reng   hmang suh. Electric line pawh off vat   rawh.

*In in emaw awmna hmun a him dawn lo ni a i hriat chuan chhuahsana hmun him/in him pan ang che.

*Motor i khalh anih chuan, hmun him electric ban / hrui leh thingkung etc., hlatah i motor ti dingin park rawh.

*Hmun him i panna lamah rangva leh thil dang thlawk i tawng thei, fimkhur hle ang che.

*Thlipui tleh hun lai (cyclone season) chuan i in bula thingkung upa tawh emaw thingṭang emaw te kit emaw thian fai la, hei hian thli tleh laia i in delh/vawchhiat lakah ati him ang.




This website belongs to Department of Disaster Management & Rehabilitation, Government of Mizoram, India. Hosted by DoICT, Template by ZENICS | Template by ICT

Click to start chatting.